تقليل الإغتراب

  

\

علشان نعالج التسويف لازم نعرف الاول ايه اللي بيجري جوه دماغنا فتخلينا نسوف المقالة ديه عباره من تلخيص لكورس تعلم كيف تتعلم.

 

 دلوقتي انت وراك حاجه انت لازم تعملها مثلا واجب, شغل, مذاكره بس انت مش حابب تعملها ده بيترجم في الدماغ او بيفعل في الدماغ مراكز الالم انت بتحس بألم فعلا فدماغك مش عايزك تحس بألم فبيحاول يصرفك لفكره ممتعه اكثر بشكل مؤقت وبيحاول يلاقي لك ملهيات علشان تنصرف عن الحاجه اللي مسببة لك ألم.

 

 فدماغك بيدور على حجج مثلا زي اذاكر قبل الامتحان علشان الماده تبقى فريش ومنسهاش او اذاكر لما الساعه تيجي تسعه بالضبط او اروح اشتري القلم اللي انا باحب اكتب بيه علشان اذاكر او انا جعان اذاكر بعد ما اكل وطبعا كلنا عارفين اللي بيحصل بعد الاكل, في شاي وفي نوم وفي حاجات ثانيه كثير.

 

 اتفرج على حلقه من المسلسل وبعدين ابدا كده وكلنا عارفين برده ايه اللي بيحصل بعد ما اتفرج على اول حلقه بتجيب ثاني حلقه فتتفرج على الموسم بالكامل انا عملت برده كده على فكره(;

 دلوقتي فهمنا ايه هو التسويف وايه اللي بيجرى بالضبط في دماغنا ايه الحل بقى ؟

 

براحه عليا, في اكثر من حل

·      اول حاجه

 انك تكلم نفسك بصوت عالي بصوت مسموع يعني ما تكلمش نفسك في دماغك لا لازم صوت عالي وتقول لي نفسك هقوم اعمل اللي ورايا وابطل مرقعه كانك بتضرب نفسك كده علشان تقوم تعمل اللي وراك

 

 

·      الحل الثاني

 

 لو المهمه اللي وراك كبيره شويه وانت مستثقلها وكل ما تيجي تفكر فيها فعلا تحس بالموت فاعمل حاجه ثانيه هي انك تركز على الوقت متركزش على الكم او على حجم المهمة اللي وراك يعني متقولش انا ورايا مذاكره كيمياء كثير جدا عمرك ما هتعمل حاجة بالشكل ده.

 

 ممكن تقول انا هذاكر 25 دقيقه بس وبعدين هاخد استراحة 5 دقايق  حاجه سهله و حاجه تقدر تنجزها بسهوله وعقلك مش هيقاومك قوي في حته زي دي مش هتحس بالم في دماغك وكمان بعد ال 25 دقيقه هتاخذ استراحة وده ما يعرف بتقنيه البومودورو كنا عملنا عنها مقالة قبل كدا

 

 

·      الحل الثالث

 لو انت عندك اكثر من حاجه فحاول تبدا بالحاجة السهلة المحببه للنفس لان مشكلتنا كلها في البداية يعني انت مجرد ما تبدا بتمشي على طول زي الفل لكن هي القصه كلها انك تتحول من مرحله ان انت ما بتعملش حاجه لي مرحلة ان انت فعلا تبدا تعمل حاجه وزي ما قلنا حاول تقسم جلسات المذاكرة 25 دقيقة و5 استراحة.

 

 وكدا هتلاقي نفسك بتنجز اكثر وانت مش حاسس بضغط وافضل بكثير من انك تخليك قاعد ساعتين فظهرك هيوجعك رقبتك هتوجعك فهتحس ان انت تعبت والعملته كثير قوي فهتريح بقى وتبطل مذاكر.

 

 

·      الحل الرابع

 والمهم جدا هو انك تبعد عن نفسك عن كل الملهيات والمشتتات اللي ممكن دماغك يخدعك بيها علشان تروح لها يعني بتحب التليفزيون خذ الريموت واديه الوالدة مثلا او الوالد وقل له متدينش الريموت غير لما اخلص مذاكرة.

 

تليفونك اقفلوا او ابعده او برده ادي لي الحج او الحجه لو الحاله صعبة حبتين علشان تعمل اللي وراك.

 

 

·      الحل الخامس

 

وهو انك تقول لنفسك لو انتهيت هكافئ نفسي بالحاجه اللي انت كنت عايزها واكتبها بس بعد ما تنجز ال 25 دقيقه بتوعك يعني مثلا انت بتحب الجيمزعلى التليفون او بتحب جيم على الكمبيوتر فكافئ نفسك دي حاجه فعاله جدا في انك تكسر نقطه البدايه اللي هو انت في مكافاه بعد 25 دقيقه او مكافاه حلوه ومحببه للنفس فالاثنين هيخدموا على بعض المكافاه هتخليك تبدا الجلسه بتاعة البومودورو اللي هي 25 دقيقه وتبقى فعلا تنجز.

 

 كمان اللعب او ايا كان الحاجه اللي هتكافئ نفسك بها هي بيسموه متعه خاليه من الذنب انت مش حاسس ان انت وراك حاجه وانت بتلعب فيه ضميرك مش بيصحى ويقعد يفكرك بيها, لا انت مستمتع لان دي مكافاه انت انجزت اللي وراك عامل كده زي زمان لما كنت بتروح تلعب كوره مع اصحابك وانت عامل الواجب انت عملت الواجب وتروح تلعب.

 

 ولكن لو انت ما عملتش الواجب وطالع تلعب كل شويه ضميرك هيأنبك وهيبقي صعب عليك تحس بالمتعة بتاعة اللعبه طبعا يعني في ناس ضميرهم ميت مبيهمهمش خالص ربنا يعافينا.

 

 التسويف من اكبر العادات السيئه على الاطلاق فانك تتعامل معه او تعرف تحل هيأثر جدا في حياتك.

الحمد الله وصلت بالسلامة لاخر سطر اتمنى انك استفدت من المقالة دي

وشكراً