سيارات ابل قريبا؟
التحدي بين ايلون ماسك وسيارات تسلا وشركة ابل
من اربع سنين كده كان اتعمل لقاء مع ايلون ماسك ..Elon Musk وإتسئل سؤال مهم جدا الصحفي سأل عن اي شركة من شركات تكنولوجيا الكبيره ممكن يبقى منافس قوى لشركه تسلا Tesla ولسيارات تسلا هنا المذيع سئله هل شركه جوجل Google ؟ لكن هو مش شايف انها مش منافس قوي لشركه تسلا Tesla لأن جوجل لها اتجاه ثاني في القياده الذاتيه ان هي تعمل السيستم او البرنامج وبعد كده يرخصوا لباقي المصنعين
سئله مرة ثانيه هل شركه ابل Apple قال له اه ممكن فعلا شركه ابل تدخل في الصناعه دي وهي فعلا شغاله على حاجه زي كده وخلال اربع سنين ممكن تلاقي سياره من شركه ابل يعني بصراحه الكلام ده كان جديد بالنسبه لي رغم ان انا عارف ان شركه ابل ماشيه في سكه السيارات الكهربائيه و انها ممكن تعمل فعلا حاجه زي كده لكن مكنتش مهتم قوي لان في شركات كثير داخله المجال ده وفي الاخر بنلاقيها مش بتكمل وبتطلع بدري بدري كده من المجال ده لكن شركه ابل لما نلاقي واحد زي ايلون ماسك Elon Musk يطلع ويكون شايف الشركه دي ممكن تعمل حاجه رغم ان مفيش اي تصريح والموضوع سري جدا!
كل اللي احنا نعرفه عن سيارات ابل حاليا هي مجرد اشاعات مفيش تاكيد فلما نلاقي واحد زي ايلون ماسك Elon Musk يطلع يقول الكلام ده يبقى الواضح كده ان شركه ابل Apple شغاله على حاجه كبيره هو ده اللي احنا محتاجين نعرفوا النهارده
فكره سياره ابل الكهربائيه
السلام عليكم اهلا بكم في مقاله جديده والنهارده ان شاء الله هنتكلم عن فكره سياره من ابل او سيارات ابل الكهربائيه هيكون شكلها عامل ازاي طيب ليه احنا عمالين بنسمع كميه اشاعات مش طبيعيه على مدار ست سنين ومن ساعتها ليه ما فيش اي معلومات مؤكده لكل التقدم ده طيب ليه المشروع ده تحديدا مع شركه ابل بتواجه فيه مراحل كثيره جدا من الفشل ولا ممكن فعلا نشوف سياره من ابل تعال نجيب الحكايه كده من اولها من ايام ستيف جوبز كان من الناس اللي بتحب تركب افضل سيارات و كان مشهور عنه ان هو بيغير السياره بتاعته كل ست شهور وبعد الست شهور كان بيجيب سياره جديده وكعادة ستيف جوبز كان شايف ان صناعه السيارات مش متنظمه صح وفي فوضة كبيرة جدا ولذلك في 2008 كان بيفكر في التغيير في صناعه السيارات كلها من خلال افكاره الجريئة الي بتقدمها شركه ابل
وحتى كان اكد الكلام ده طوني فاضل وده كان احد مهندسي ابل الكبار وكان مسؤول عن ايبود وبعض تصميمات الايفون الراجل ده في مقابله مع وكاله ليمبورغ كان بيقول انهم كانوا بيفكروا في كل تفاصيل السيارة شكلها عامل ازاي تصميمها عامل ازاي الكمبيوتر اللي جوه هيكون شكلو ازاي هتبقى غاز ولا كهرباء ولا بنزين التفاصيل دي كلها كان بيتكلموا فيها لكن مع كثر المناقشات وصلوا في الاخر الى ان الموضوع مخاطره كبيره جدا لو ابل دخلت الصناعه دي لان صناعه السيارات في الوقت ده في 2008 كانت تضررت بشكل كبير جدا بسبب الازمه الماليه
موقف شركة ابل من السيارات لحد سنه 2014
وغير كده يعني شركه ابل كانت مشغوله جدا فى باقى منتجات ابل والايفون اللي كان لسه في بدايته لكن مع الوقت لحد سنه 2014 بقى بدات تظهر التسريبات عن جود مشروع لسياره كهربائيه ذاتيه القياده من شركه ابل ومكان العمل على المشروع ده بيتم في المقر الرئيسي لابل لاكن ليه مكان منفصل و بعيد شويه علشان السريه هنا بقى علشان انت مركز معايا حبتين هتقولي لا ثانيه واحده كده انت دلوقتي بتقول لي ان المشروع بداء 2014 يعني كان شركه تسلا موجوده وواقفه على رجليها صح اقول لك اه صح هتقول لي طيب ليه شركه ابل ماشتريتش تسلا وتريح دماغها وتبدا تطور من اللي عملته شركه تسلا
الاستحواز على شركة تسلا من ابل
اقول لك ما هي اصلا فكرت فعلا في الاستحواذ على شركه تسلا لكن معرفتش
شركه ابل يا سيدي قبل المشروع بتاعها ده بكم شهر تقريبا في 2013 بدات انهي تتفاوض وتتكلم مع شركه تسلا على موضوع الاستحواذ بس برده في نفس الوقت يعني شركه ابل كان عندها شرط علشان الصفقه دي تتم الشرط ده ان واحد زي ايلون ماسك Elon Musk ما يبقاش موجود في الشركه هم مش عاوزينه والراجل ده يمشي بعد كده شركه ابل هتجيب حد ثاني يمسك شركه تسلا
كان السبب ان ايلون ماسك Elon Musk .... انت عارفه يعني يعني تصرفاته صعبه جدا وصعب ان انت تسيطر عليه بيقول اي كلام في اي وقت والكلام ده ممكن يدمر شركته وعادي جدا تلاقيه يطلع على الهواء كده و يشرب سيجاره حشيش
تصرفات زي دي استحاله ان شركه ابل كانت توافق عليها فكان لازم الراجل ده يمشي المهم انهم موصلوش لحل في النهايه والصفقه دي فشلت خلي بالك بعد كم شهر في 2014 نلاقي ابل تطلع بمشروع تيتان Archives يعني مشروع مشروع تيتان كان سري جدا في الوقت ده وبدا باثنين مهندسين ومفيش كم شهر وصل الرقم ده لالف مهندس والحاجة الجامدة ان اغلب الموظفين دول من تسلا وفيات ومرسيدس وفراري يعني الشركات الكبيره جدا اه , امال انت فاكر ايه يعني احنا معنا فلوس كثيره جدا نعرف نجيب اي حد ومن اي مكان في اي وقت
مشاكل شركة ابل مع مشروع انتتاج سيارة ثورية
لكن على عكس المتوقع بقى تبدا المشاكل الداخليه ويحصل تخبط كبير جدا في المشروع ده والسبب هنا كانت الافكار الخياليه لسيارات ابل او تخيل سيارات ابل المستقبليه طبعا انت قاعد دلوقت وعايز تعرف ازاي شركه ابل تفشل في مشروع زي ده شوف يا سيدي المشروع ده لما بدا بدا تحت قياده واحد اسمه ستيف زادسكي
ستيف ده والفريق اللي معه بدأوا ان هم يفكروا في الشكل اللي المفروض تكون عليه سيارات ابل فبدأت بقى تطلع فكره القياده الذاتيه الكامله يعني احنا نعمل تصميم خيالي وبسيط ما فيش في اي عجله قياده ولا دواسات بنزين ولا فرامل ولا الكلام ده خالص هم بس الكراسي وحتى الكراسي يكون ليها اشكال خرافيه وعندك بقى كمبيوتر جوه التصميم غريب جدا والحاجات بتاعت الواقع الافتراضي
هي دي الافكار اللي كانت ماشيه في ابل في الوقت ده وكمان نعمل لهم ابواب بتتفتح وتتقفل كده من غير ما تعمل اي صوت خالص وكمان نغير العجل بتاع السياره ونعمله على شكل كروي مش الشكل التقليدي اللي احنا نعرفه وده يخلي السياره تتحرك في اي اتجاه بشكل سهل جدا ده احنا باللي احنا هنعمله بالافكار دي كلها احنا هنغير العالم كله و هنغير مجال صناعه السيارات
بصراحه بقى بيني وبينك كده لحد النقطه دي كان المفروض ان احنا كنا نشوف سياره جامده جدا مشفنهاش قبل كده من شركه ابل لكن مش هو ده اللي هيحصل ليه؟ لان مش كل الناس اللي كانوا في الفريق كان عندهم نفس الرؤيه دي
شويه منهم كان عندهم رؤيه لسياره القياده بس برده تكون قريبه من النظام الحالي اللي هي عجله قياده موجوده ودواسات وفرامل والحاجات دي حاجه كده شبه تسلا بالضبط بدات بقى الخناقه ما بين جوني آيف كبير مصممي ابل اللي كان عايز الأفكار الخاليه دي وما بين ستيف زادسكي اللي كان عاوز سياره فيها الخيارين الخناقه دي فضلت شغاله ما بين الاثنين من 2014 الى 2016 ومفيش حاجه خالص بتتعمل والمفروض ان شركه ابل تعلن عن السياره دي في 2019 وهنا نشوف ستيف زادسكي يمشي من الشركة ويسيب فراغ كبير هنا تدخلت بقى شركه ابل وعينت واحد اسمه بوب مانسفيلد بعد لما كان الراجل ده على فكره تقاعد في 2012 رجعوه مره ثانيه علشان يمسك مشروع السيارات
بوب مانسفيلد وسيارة ابل
صاحبنا ده في البدايه اول لما مسك الادارة قرر ان هو يركز المشروع كله بشكل اكبر على تطوير نظام القياده الذاتيه والسبب هنا ان شركه جوجل كانت قاطعه شوط كبير في المجال ده وشكلها كده كانت هتنفرد الى حد ما هي وتسلا وكم شركه تانين بالقياده الذاتيه
فكان لازم ان هو يركز المشروع بسرعه على الحته دي وبدا ان هو ساعتها يسرح موظفين كثيرين جدا ويعين ناس جديده تساعده ان هو يركز على القياده الذاتيه في 2017 بقى طلع الرئيس التنفيذي لابل تيم كوك في مقابل مع بلومبرج وقال ان ابل شغاله على صنع النظام للسيارات ذاتيه القياده وفي اللحظه دي هنقول خلاص كده ابل اصبحت ماشيه في طريق شركه جوجل اللي هو انا اعمل النظام وشركات السيارات ومصانع السيارات الكبيره تاخد البرنامج ده او النظام ده
وفكك بقى من موضوع تصنيع السيارات بنفسنا لكن الواضح ان تركيز ابل مكانش على السيستم فقط ابل حاليا ماشيه في المسارين في السيستم وفي نفس الوقت صنع السياره الخاصه بيها والدليل على كده بقى زي ما قلت لك في مقدمه الحلقه لما واحد زي ايلون ماسك Elon Musk يتسئل عن المنافسين الجداد اللي هينفسهم خلال السنوات اللي جايه ويفرق ما بين شركه جوجل وابل ويشوف ان ابل راحة في سكه ثانيه ده دليل و دليل قوي جدا لان الكل طالع ينافسه هو فلما هو يطلع يقول المعلومه دي لازم اننا نأخذها على محمل الجد دي نقطه
النقطه الثانيه علشان تعرف شركه ابل رايحه على فين او متجهه لتصنيع السياره بنفسها ولا لا روح دور على الموظفين الي ابل بتوظفهم روح دور على الشركات الي ابل بتعمل معها شركات روح دور على الاستحواذات اللي ابل بتعملها في السنوات الاخيره
شراكة ابل مع باقي شركات السيارت
شوف يا سيدي شركه ابل لما لقيت ان تصنيع السيارات فعلا عمليه معقده مليانة مشاكل تقنيه و هتاخذ وقت كبير لجأت للحل اللي دائما لما بتيجي تدخل اي مجال جديد بتعمله يمكن احنا اتكلمنا عن الموضوع ده قبل كده في اللحظه دي شركه ابل بتدور على شريك تصنيعي هي تعمل التصميم وهو ومصانعه والادوات بتاعته يقدر ينفذ التصميم ده تفتكر بقى لما شركة ابل تدور على شريك مين هيكون الشريك؟
اكيد طبعا هتكون اما مرسيدس او بي ام دبليو راحت فعلا شركه ابل تتكلم مع الاثنين لكن الاثنين رفضوا التعامل مع شركه ابل والسبب هنا انهم شركات كبار جدا لازم يكونوا مشاركين في كل حاجه مش تيجي ترمي لي التصميم وتقول لي انا السيطره معايا والادارة بتاعتي وانا اللي هاعمل عمليات التطوير وكده
ابل في اللحظه دي مع بي ام دبليو ومرسيدس كانت عايزه تسيطر على كل حاجه انت بس تصنع وتنفذ اللي انا اقول لك عليه فالشركات دي رفضت انها تتعامل مع شركه ابل فبعدها بفتره لقينا ابل بتغير شويه من الشروط بتاعتها وكده يعني وتوصل في الاخر لشراكه مع شركه فولكس فاجن وبعدها برده طلع كلام ان هي هتشارك مع نيسان وبي واي دي الصينيه و مكلارين وبرده في الوقت ده لقينا شركه ابل اخددت التصاريح الحكوميه المطلوبة لتجريب السيارة والنظام الجديد وحاليا عندها عدد كبير من السيارات اللي موجوده في الشوارع و مركبه على السيارات دي الاجهزه بتاعتها علشان تختبر تقنيه القياده الذاتيه زيها زي جوجل وتسلا وطبقا كمان لصحيفه الورد ستريت جورنال ان ابل بقى شغاله على تطوير بطاريات للسيارات مع عملاق تصنيع البطاريات الصيني اللي هي شركه سي اي دي ال C.I.D.L لتطوير بطاريات خاصه بشركه ابل
وبرده طبقا لوكاله رويترز بتقول ان عندها معلومه ان شركه ابل بتسعى لبناء شبكه من محطات الشحن الكهربائي او بمعنى اصح بتخطط وبتشوف الدنيا دي بتتعمل ازاي
برده في 2018 شركه ابل توظف دوك فيلد وده كان يعتبر كبير المهندسين في شركه تسلا وبقاله اكثر من ست سنين في تسلا وعارف الدنيا كلها شغاله ازاي واحنا رايحين فين طيب واحد زي ده تحتاجه في ايه مثلا الا لو انت فعلا ماشي في سكه تصنيع سياره كامله مش مجرد نظام
حاليا دلوقتي فين شركه ابل من مشروع انتاج سيارة ذكية
شوف الاشاعات اللي منتشره بتقول ان في احتمال كبير جدا ان يتم الاعلان عن سيارات ابل في اي وقت من الاسبوع ده الي السنتين الجايين ممكن المؤتمر اللي جاي تطلع شركه ابل وتعلن عن ان في مشروع زي كده واحنا بنعمل سياره او تدي اي تفاصيل رسميه عن الموضوع ده
ابل فعلا بتجري جامد جدا في المشروع ده حاليا عدد الموظفين اللي عندها تجاوز ال 5000 موظف ونقطه كده بخصوص الارقام انا مش عايزك تعتمد عليها قوي لان مصدرها ضعيف الارقام تحديدا لانها مش رسميه
اسعار سيارت شركة ابل المتوقعة
نقطه ثانيه برده مش عايزك تتوقع ان لو فعلا ابل طلعت سياره ان اسعارها هتكون قريبه كده من اسعار شركه تسلا, لا خالص ابل هتكون اسعارها عاليه جدا جدا كعاده شركه ابل ومن وجهه نظري ماتتوقعش ان شركه ابل مش هتطلع بفكره سيارات فوريه تغير كل مفاهمنا عن مجال الصناعه السيارات الموضوع ده من وجهه نظري صعب جدا جدا
السبب في كده انها تحت قياده تيم كوك يعني تيم كوك كل اللي يهمه فقط هو الارباح الايرادات الارقام التريليونات مش الابداع والانفراد والافكار الثوريه الدليل على كده شوف اخر 10 سنين شف من بعد ستيف جوبز هل شوفت مونتاج ثوري غيرت فكرنا عن استخدام التكنولوجيا من شركه ابل ابدا.
يعني كلها من وجهه نظري شويه تحديثات نتفق انا وانت او نختلف على اهميه التحديثات دي لكن ما فيش اي منتج ثوري
سياره ابل لو اتعملت هتكون تطوير ل سيارات تسلا مش اكثر او حاجه جديده فيها و دي وجهه نظري اللي ممكن جدا جدا اكون مخطئ فيها في النهايه بقى لما تبعد شويه كده عن الموضوع وتحاول تفكر و تجاوب على سؤال
هل لو فعلا شركه ابل عملت سياره هل فعلا ممكن تقضي على شركه تسلا
لما تفكر في الموضوع ده هتقول وليه لا يعني شركه ابل معها كميه فلوس كبيره جدا محتاجه تستثمر الفلوس دي و هتقدر تحل كل المشاكل اللي بتواجه شركه تسلا حاليا داء الكلام اللي من النظره الاولى مثلا للموضوع
لكن لما تفكر في الموضوع شويتين كده هتلاقي ان في الحقيقه عمر ما كان تصنيع سياره جديده بالشكل ده عمره ما كان متوقف فقط على الفلوس الموضوع كله متوقف على المهندسين على المبدعين على الناس اللي هتقدم جديد في المجال ده والا كنا شوفنا شركات السيارات الكبيره مثلا يدخل في مجال السيارات الكهربائيه ذاتيه القياده بكل سهوله وتعمل عن انظمه جامده جدا للقياده الذاتيه بس كده يا سيدي دي كده كانت حكايه النهارده حكايه سيارات ابل
إرسال تعليق